ނޮޅިވަރަމު ކައުންސިލް ކަޕް 2023 – ކަންމަތި ސްޕޯޓްސް ކްލަބް ފައިނަލަށް ދަތުރުކޮށްފި
ނޮޅިވަރަމު ކައުންސިލުން އިންތިޒާމްކޮށްގެން ކުރިއަށް ގެންދާ “ނޮޅިވަރަމު ކައުންސިލް ކަޕް 2023″ގެ ފައިނަލަށް ‘ކަންމަތި ސްޕޯޓްސް ކްލަބް’ ދަތުރުކޮށްފިއެވެ.
ޖުމްލަ 05 ޓީމަކުން ބައިވެރިވެގެން ކުރިއަށް ގެންދާ މި މުބާރާތުގެ ފައިނަލަށް ‘ކަންމަތި ސްޕޯޓްސް ކްލަބް’ ދަތުރުކޮށްފައިވަނީ ގްރޫޕް ސްޓޭޖުގައި ކުޅުނު 4 މެޗުގެ ތެރެއިން 3 މެޗު ކާމިޔާބުކޮށް 1 މެޗު އެއްވަރުކޮށްލައިގެން ޖުމްލަ 10 ޕޮއިންޓާއެކުގައެވެ.
މުބާރާތުގައި އެންމެ ފުރަތަމަ ‘ކަންމަތި ސްޕޯޓްސް ކްލަބް’ ނުކުތީ ‘ސްޓޫޑިއޯ ބޯއީސް’އާ ދެކޮޅަށެވެ. އެ މެޗު، ‘ކަންމަތި ސްޕޯޓްސް ކްލަބް’ގެ ޖޯޒީ ނަންބަރު 10، މަޢައްދު އަދްނާންގެ ހެޓް-ޓްރިކާއެކު އެ ޓީމުން ކާމިޔާބުކުރީ 4-1ގެ ނަތީޖާއަކުންނެވެ. މެޗުގެ މޮޅު ކުޅުންތެރިޔާގެ މަޤާމު ވެސް ލިބުނީ މަޢައްދުއަށެވެ.
‘ކަންމަތި ސްޕޯޓްސް ކްލަބް’ ގްރޫޕް ސްޓޭޖުގެ ދެވަނަ މެޗުގައި ނުކުތީ ‘ޗަކުލީ’އާ ދެކޮޅަށެވެ. ‘ޗަކުލީ’އާ ދެކޮޅަށް ކުޅުނު މެޗުގައި ވެސް ތަފާތު ބޮޑު ނަތީޖާއަކުން ‘ކަންމަތި ސްޕޯޓްސް ކްލަބް’ ވަނީ މެޗު ކާމިޔާބުކޮށްފައެވެ. 8-3 އިން ‘ކަންމަތި ސްޕޯޓްސް ކްލަބް’ މޮޅުވި އެ މެޗުގައި ވެސް މަޢައްދުގެ ހެޓް-ޓްރިކެއް ފެނިގެންދިޔައެވެ. އަދި ހަމަ އެހެންމެ މޮޅު ކުޅުންތެރިޔާގެ މަޤާމު އެ މެޗުގައި ވެސް ހޯދީ މަޢައްދުއެވެ.
ހަމައެފަދައިން ‘ވައި.އެފް.ސީ’އާ ދެކޮޅަށް ‘ކަންމަތި ސްޕޯޓްސް ކްލަބް’ ނުކުތް މެޗު ވެސް އެ ޓީމުން ވަނީ 3-0ގެ ނަތީޖާއަކުން ކާމިޔާބުކޮށްފައެވެ. އަދި ގްރޫޕް ސްޓޭޖުގެ އެންމެ ފަހު މެޗުގައި އިއްޔެ ‘ކްލަބް ކްލަސްޓަރ’އާ ދެކޮޅަށް ނުކުތް މެޗު ނިމިގެން ދިޔައީ ދެ ޓީމުން ކުރެ އެއްވެސް ޓީމަކަށް ލަނޑެއް ކާމިޔާބު ނުކުރެވިއެވެ.
މުބާރާތުގެ ފައިނަލުން ފުރަތަމަ ޖާގަ ‘ކަންމަތި ސްޕޯޓްސް ކްލަބް’އިން ކަށަވަރު ކޮށްފައިވާއިރު، ސެމީ ފައިނަލުގެ 2 ޖާގަ މިހާރު ވަނީ ‘ކްލަބް ކްލަސްޓަރ’އާއި ‘ޗަކުލީ’ ކަށަވަރުކޮށްފައެވެ. އެގޮތުން ‘ކްލަބް ކްލަސްޓަރ’ މުބާރާތުގެ ސެމީ ފައިނަލަށް ދަތުރުކުރީ ގްރޫޕް ސްޓޭޖުގައި ކުޅުނު 4 މެޗުގެ ތެރެއިން 2 މެޗު ކާމިޔާބުކޮށް 1 މެޗުން ބަލިވެ އަނެއް މެޗު އެއްވަރު ކޮށްލައިގެން، ޖުމްލަ 7 ޕޮއިންޓާއެކުގައެވެ.
މުބާރާތުގެ ސެމީ ފައިނަލުގައި ‘ކްލަބް ކްލަސްޓަރ’އާއި ‘ޗަކުލީ’ ވާދަކުރާނީ ޖުލައި 18 ވާ އަންގާރަ ދުވަހުއެވެ. އަދި ސެމީ ފައިނަލް ކާމިޔާބުކުރާ ޓީމެއް މުބާރާތުގެ ފައިނަލުގައި ‘ކަންމަތި ސްޕޯޓްސް ކްލަބް’އާ ދެކޮޅަށް މިމަހުގެ 20 ވާ ބުރާސްފަތި ދުވަހު ނުކުންނާނެއެވެ.